Os
que non viviron as Semanas Santas de antes non terán nunca aquela sensación de
opresión que agoniaba as persoas mozas daquela, as que non eran tan mozas e as
que viviran a breve liberdade republicana. Tristeza por decreto. Nin música na
radio, nin programación normal na televisión, tendas e bares pechados, cheiro a
cirio, veos ocultando rostros, roupas negras, mulleres descalzas, capirotes
morados, silencio, ruxe ruxe de pés arrastrados, toses contidas e o ritmo esmagante, obsesivo, de trompeta e tambor.
Ao
Fidel non se lle ocorreu mellor idea que ir botar un pito ao balcón da súa casa
no momento no que se achegaban as fileiras silenciosas bordeando as imaxes e as galas dos gardas civís.
O vello párroco, falanxista de mozo, gozoso benfeitor cos cartos que pedichaba
ou extorsionaba para maior grandeza da Vera Cruz, sufrido vixiante da moral
vilega, doloroso látego de desviados, ordenou deter a procesión dos caladiños e
arremeteu con voz tronante, como a que lle poñían a Deus cando lle entregaba as
táboas da lei a Moises-Charlton Heston, contra aquel desviado do rabaño de Deus
que ousaba darlle unhas caladas ao cigarro mentres observaba a expresión da dor
do pobo.
Quen
lle ía dicir a aquela encarnación de do Don Camilo de Guareschi, que a
diferenza deste non tiña enfronte a Peppone senón ao seu lado outro falanxista na alcaldía, que
ao final a Semana Santa remataría por converterse noutro espectáculo sometido
aos criterios de rendibilidade do turismo de masas. Ao final, o provocador
Fidel tivo que resgardarse no seu cuarto ante a desencadeada ira de Deus
voceada polo xusticeiro apacentador de ovellas que emitía toda caste de
insultos, iso si, axeitados á temática:
impío, ateo, irreverente, profanador, sacrílego, blasfemo, descrido... e
despois toda unha restra de males que lle acontecerían ata queimarse no
inferno.
A
coincidencia fixo cadrar este ano o Venres Santo co Día da II República. Aquela
república burguesa que lle meteu o medo no corpo a terratenentes, oligarcas,
curas e militares e púxoos a conspirar
contra ela o mesmo día da súa proclamación.
Xoves, 13 de abril de 2017
Ningún comentario:
Publicar un comentario