venres, maio 05, 2017

Alegoría de dous mundos

Contan que, no seu desespero,  unha familia á que lle desaparecían as cousas, furábanselle as potas e camas, cadeiras e mesas movíanselle soas e que polas noites, no faiado, non paraban de dar golpes como se alguén batese cunha vasoira ou un can rabuñase as táboas, decidiu coller os tarecos, metelos nun carro e abandonar a casa. No medio do camiño atoparon cun veciño que lles preguntou que facían. De entre os mobles apiñados no carro escoitouse unha voz que dicía: mudámonos de casa!. Aquela xente non daba deixado atrás o seu particular trasno.

Non creo que fose unha decisión premeditada do editor, senón unha trasnada rebuldeira daquel aduaneiro que antes se dicía que habitaba nas imprentas e mudaba os tipos para inventar grallas cheas de enxeño. Digo que debeu ser un condenado cachafello o que fixo coincidir a contracapa da edición de Vigo de “La Voz” coa páxina de economía do xornal de onte para reflectir coa maior crueza a realidade dun mundo inxusto en esencia. E que cómpre mudar de raíz.

Vóullelo contar pois, virado á  nosa lingua propia segundo o Estatuto de Autonomía, e non, xa que logo, na lingua impropia do país que empregan a cotío os medios de comunicación escrita, “Ces lupanards de la pensée” chamoulle Balzac, oral ou audiovisual.

A contracapa viguesa estaba dedicada na súa integridade a José Antonio Iglesias e Arantxa Castro, unha parella que tivo que entregar os seus fillos por carecer de medios e que vive con 98 euros ao mes. O titular era: “Agora que nos ofrecen traballo en Barcelona, non podemos pagar a viaxe”. Dous subtitulares enmarcaban a foto da parella sentados nun sofá: “Dos 473 euros da RISGA, 375 van para o alugueiro do piso e os 98 restantes son para luz, auga, gas e comida” e “A súa estancia en Vigo foi un continuo peregrinar na procura dun teito onde acubillarse”. Dúas entradiñas aclaran algúns pormenores: “Axudas: A parella recibiu axudas de AFAN, Os Ninguéns, Concello (150 euros de emerxencia) e Xunta (473 euros ao mes)” e “Centros: Viviron no albergue de Marqués de Valadares, nunha habitación dunha casa en ruínas e agora nun piso de alugueiro”. O desenvolvemento da nova afórrollela pois xa se fan unha idea.

Imos agora coa páxina seguinte, a 31 do xornal, que abre a sección de Economía.  En ¾ de paxina, acompañada da foto do dono venezolano de Abanca, a nova informa que esta entidade “... estréase nas compras ao facerse coa financeira do Popular” e nun subtítulo “Crea a quinta firma de crédito ao consumo do país ao sumar o antigo negocio do Pastor. A altura da nova principal infórmase de que “Os galegos pagan 53 euros menos ao ano de hipoteca tras a caída do euríbor”.

Outras dúas novas completan a páxina. Unha a catro columnas con foto informa de “Larena cobra cinco millóns por sete meses de traballo”. Lendo polo miúdo sabemos que o tal Larena seica foi conselleiro delegado do Banco Popular.

A páxina completase coa nova de “Amancio Ortega recibirá este ano un 13% máis de Inditex: 1.256 millóns de euros”.

    Ce tout!


Xoves, 4 de maio de 2017

Ningún comentario:

Publicar un comentario