O mesmo día prodúcese a sentenza. Considera
probados os feitos, ao Urbano autor dos mesmos e condénao á pena de reclusión
perpetua como autor dun delito de rebelión por adhesión, coas accesorias de
interdición civil e inhabilitación absoluta, séndolle de aboamento a prisión
preventiva e reservándose o estado e aos particulares a acción civil correspondente
para pedir a reparación do dano e indemnización dos prexuízos polo que a estes
efectos ordena se remita a resolución á comisión provincial de incautación de
bens.
Inmediatamente comunícaselle a Urbano a
sentenza. O Auditor de Guerra aproba a sentenza o 15 de xaneiro e o mesmo día o
Xeneral Xefe da VIII Rexión Militar, ratifícaa. Na liquidación de condena
indícase que Urbano foi detido o 24 de xullo e que a pena quedaría extinguida o
20 de xullo de 1966.
Nun escrito do 13 de agosto de 1940, o xuíz
especial de conmutación de penas de Vigo indica que o día nove do mesmo mes
dispuxera a liberdade do condenado en prisión atenuada no seu domicilio, á
espera do resultado definitivo da proposta.
O 14 de outubro de 1941 o xuíz instrutor
especial de conmutación de penas de Vigo, Ángel Lloveres Abelleira comunica ao
xuíz de Instrucción de Baiona as seguintes dilixencias: a notificación a Urbano
Rodríguez Barreiro que lle foran concedidos os beneficios de prisión atenuada
no seu domicilio; que se lle notifique a prohibición absoluta de ausentarse da
súa residencia e que non pode cambiala baixo pretexto algún sen autorización
expresa; así como que poña en coñecemento da policía ou Garda Civil da
situación legal do condenado a fin de que sexa vixiado.
Infelizmente o xuíz de Baiona xa non lle
poderá comunicar a Urbaniño as dilixencias ordenadas. Herminio Ramos anotou no
seu diario:
“1941, agosto 14. El ex municipal
Urbaniño, uno de los rojos puestos en libertad,
en el día de hoy aparece muerto en los montes de Bahíña, a consecuencia de la caída de un pino.”
Sen embargo a burocracia militar continúa o
seu percorrido kafkiano e a causa non será arquivada ata 1944. Mesmo en
febreiro de 1943 o xuíz militar envía unha comunicación á Garda Civil de Baiona
para que “cese la vigilancia a que dicho penado está sometido”. De feito ata
novembro de 1943 non se incorpora á causa copia da acta de defunción de
Urbaniño “o municipal”.
Venres, 1
de decembro de 2017
Ningún comentario:
Publicar un comentario